Thursday 15 January 2015

བློ་སྦྱོང་སྙན་ངག་སྒྲ་རྒྱན།


༄༅།།བློ་སྦྱོང་སྙན་ངག་སྒྲ་རྒྱན་བཞུགས་སོ།།


རྗེ་ཙོང་ཁ་བ་བློ་བཟང་གྲགས་པ།




རྒྱལ་བ་སྲས་དང་བཅས་ལ་ཕྱག་འཚལ་ལོ།།
རྒྱལ་ཁམས་སེམས་ཅན་ཐམས་ཅད་བདེ་གྱུར་ཅིག།
རྒྱལ་སྲས་རྣམས་ཀྱི་སྙན་ངག་སྒྲ་རྒྱན་དང་།།
རྒྱལ་བའི་གསུང་རབ་ཆོས་ཀྱི་དགའ་སྟོན་བྱ།།


དར་དིར་འགྲོ་བའི་ཚོགས་རྣམས་མ་ལུས་ཀུན།།
བན་བུན་དད་གཞི་དྲག་པོའི་ཀུན་སློང་དང་།།
ཁྲལ་ཁྲོལ་བློ་གྲོས་ཡངས་པའི་ཤེས་རབ་ཀྱིས།།
ལྗན་ལྗིན་ལས་ཀྱི་སྡིག་སྒྲིབ་སྦྱང་བར་གྱིས།།

མྱུར་བར་མྱུར་བར་སྡིག་སྒྲིབ་མ་སྦྱངས་ན།།
རང་རེ་རང་རེའི་ལས་འདི་དབང་བཙན་པས།།
བདེ་བ་བདེ་བར་ཤེས་ཀྱང་འདམ་དབང་མེད།།
སྡུག་པ་སྡུག་པར་ཤེས་ཀྱང་འདོར་དབང་མེད།།

སྐྱེ་བོ་ཕལ་ཆེར་ཕལ་ཆེར་ལས་ཀྱིས་མནར།།
ཉན་ཐོས་འཕགས་པ་འཕགས་པ་སྒུར་ཆུང་སོགས།།
རྒྱལ་བའི་ཉན་ཐོས་ཉན་ཐོས་འགའ་ཞིག་ཀྱང་།།
ལས་འབྲས་བདེན་པ་བདེན་པས་མནར་བར་གསུངས།།

ལས་འདི་བདེ་སྡུག་དུ་མས་བསྐྱེད་མ་བསྐྱེད།།
དུས་གསུམ་བདེ་བར་གཤེགས་པས་མཁྱེན་མ་མཁྱེན།།
སེམས་ཅན་དཔག་ཏུ་མེད་པས་མྱོང་མ་མྱོང་།།
རང་ཉིད་གར་སོང་མེད་པར་བྲལ་མ་བྲལ།།

དེ་ཕྱིར་ལས་འབྲས་བསླུ་བ་མེད་བསམས་ནས།།
ད་ནི་དཀར་ནག་ལས་ལ་འདམ་ག་འཚལ།།
དེ་རིང་ནས་བཟུང་སྡིག་ལ་འཛེམ་པར་བྱ།།
དོ་ནུབ་ནས་བཟུང་དགེ་ལ་འབད་པར་བྱོས།།

དཀར་ནག་ལས་རྣམས་བསམ་པ་བཟང་ངན་ལགས།།
བསམ་པ་བཟང་ན་ས་དང་ལམ་ཡང་བཟང་།།
བསམ་པ་དམན་ན་ས་དང་ལམ་ཡང་དམན།།
ཐམས་ཅད་བསམ་པ་དག་ལ་རགས་ལས་པས།།

མཉམ་མཉམ་འགྲན་འདོད་བསམ་ངན་འཆང་བ་དང་།།
ཕྱོགས་ཕྱོགས་ཆགས་སྡང་རུས་ཞེན་འཐེན་པ་ཡང་།།

རང་རང་སྡུག་བསྔལ་རྒྱུ་རུ་མི་འདུག་གམ།།
ཡང་ཡང་ལེགས་པར་སོམས་དང་ཤེས་ལྡན་རྣམས།།



ཆོས་མིན་མདུན་མའི་ལས་ལམ་བསླུ་བྲིད་མཁན།།
འདོད་སྲེད་ཡིད་ཀྱི་ཝལ་ཝལ་ཅོལ་ཆུང་པོ།།
བློ་སྣ་ཕར་ཕར་ཁྲིད་དུས་སྡུག་བསྔལ་འབྱུང་།།
ལྷ་སྦྱིན་ཆགས་སྡང་སྡང་ཞུགས་ཚུལ་ལ་ལྟོས།།

དེ་བས་བསམ་པ་བཟང་པོའི་སེམས་བསྐྱེད་བསྐྱེད།།
སེམས་འདི་དགེ་ན་དལ་འབྱོར་དོན་ཡོད་ཡོད།།
སེམས་འདི་མི་དགེ་དལ་འབྱོར་དོན་མེད་མེད།།
སེམས་འདི་དགེ་བར་གྱིས་དང་གྲོགས་ཀུན་ཀུན།།

དགེ་སེམས་ངང་ནས་གསུང་རབ་ཚིག་དོན་དེ།།
ཐོག་མར་ཐོས་དང་བསམ་པས་སྒྲོ་འདོགས་ཆོད།།
ཕྱིས་ནས་ཐོས་བསམ་སྒྲོ་འདོགས་ཆོད་བཞིན་དུ།།
དབེན་པར་སོང་སྟེ་བསྒོམས་ན་དོན་ཡོད་དོ།།

དེ་རྗེས་གཞན་ཕན་ཁོ་ནའི་སེམས་བསྐྱེད་དེ།།
མ་ལུས་སེམས་ཅན་ཀུན་གྱི་ཕ་དང་མ།།
དུ་མར་བྱས་པའི་དྲིན་ལ་སེམས་བཞིན་དུ།།
ཕན་ཐོགས་ཅི་ནུས་གྱིས་དང་ཀུན་ལ་ཕན།།

བྱས་པ་ཤེས་ཤིང་དྲིན་དུ་གཟོ་བ་འདི།།
འདི་དང་ཕྱི་མར་རང་གཞན་དོན་དུ་བཟང་།།
བཟང་གི་དྲིན་ལན་ངན་གྱིས་འཇལ་བའི་མི།།
མི་དེ་དུད་འགྲོ་ལས་ཀྱང་དམན་པར་གསུངས།།

འགྲོ་དག་སྙིགས་མའི་དུས་ཀྱི་སྐྱེས་བུ་ལ།།
བུ་ལ་མ་ལྟར་བརྩེ་བའི་ཕན་སེམས་ཅན།།
སེམས་ཅན་ཡོངས་ལ་དམ་པའི་ཆོས་སྟོན་པ།།
སྟོན་པ་སངས་རྒྱས་དེ་ཡི་རྗེས་སུ་སློབ།།

དད་པས་གཞན་ལ་ཕན་བྱེད་སེམས་འདི་བཟང་།།
བཟང་འདི་སེམས་བྱེད་ཕན་ལ་གཞན་པས་དད།།
རིགས་པར་བསྟན་པས་དགོས་དུས་སེམས་ལ་ཕན།།
ཕན་ལ་སེམས་དུས་དགོས་པས་བསྟན་པར་རིགས།།

བཟང་སེམས་སྦྱོང་དང་གནོད་སེམས་རིམ་གྱིས་འགྲིབ།།
ཏིང་འཛིན་སྒོམ་དང་སྒྲིབ་གཉིས་ཤུགས་ལ་འདག།
སྙིང་རྗེ་བསྐྱེད་དང་དགེ་བ་ངང་གིས་འཕེལ།།
གཉེན་པོ་བསྟེན་དང་ཉོན་མོངས་རང་སར་འཇིལ།།

དགྲས་ཀྱང་གཉེན་བྱེད་ཕན་བྱེད་གཉེན་ཀྱང་དགྲས།།
བྱེད་ལ་སུ་སེམས་སྡང་སེམས་སུ་ལ་བྱེད།།
བསམ་ན་ཐམས་ཅད་གཉེན་དང་ཕ་མར་འདུག།
མདོར་ན་སྡིག་སེམས་སྤོངས་ལ་དགེ་སེམས་བསྟེན།།

རྒྱུད་ལ་གནོད་སེམས་མ་འཆང་ཕན་སེམས་ཆོངས།།
ཐོས་དོན་སེམས་ཤིང་བསྒོམ་ལ་སེམས་རྒྱུད་འཐུལ།།
འཇིག་རྟེན་དོན་མེད་སྤོངས་ལ་དོན་ཡོད་བསྟེན།།
ཅིས་སྟེ་ཅིས་ཀྱང་འཇིག་རྟེན་མི་སྤོངས་ན།།

ཆོས་དང་ཆོས་མིན་བསམ་པའི་འཁྱེར་སོ་ཡིན།།
འདུ་འཛི་འདུ་ལོང་ཆོས་སུ་བསྒྱུར་ཐབས་གདའི།།
རང་གིས་རང་ལ་ཤ་ཚའི་གྲོས་འདེབས་ཀྱིས།།
དཀར་འབྲས་དཀར་ལ་ནག་འབྲས་ནག་གོ་ཞེས།།

ཕན་འབྲས་བདེ་ལ་གནོད་འབྲས་སྡུག་པར་གསུངས།།
བཤེས་དང་གྲོགས་ལ་གཉེན་དང་ཕ་མ་ལྟར།།
གཞན་ལ་ཐན་ཐུན་ཕན་ན་རང་ལ་ཕན།།
གཞན་བདེ་ཚང་ཚིང་བསྲེག་པའི་གནོད་སེམས་འདི།།

སྡིག་སྒྲིབ་ལྗན་ལྗིན་གསོག་པའི་གཞོང་པ་ཡིན།།
དོན་མེད་སྡིག་སྒྲིབ་གསོག་པ་རིང་དུ་སྤོངས།།
ཆོས་རྫས་འདུག་ཚད་རྣམས་ལ་མོས་གུས་བསྐྱེད།།
སེམས་ཅན་འདུག་ཚད་རྣམས་ལ་བྱམས་པ་སྒོམ།།

མཐོང་ཚད་བདེ་བར་གྱུར་ཅེས་ཁྱབ་པར་སེམས།།
སྤྲོ་དགའ་བསྐྱེད་དཔའི་ཆོས་ལ་རྟོག་དཔྱོད་དཔྱད།།
དད་ལྡན་ཡིད་ལ་ཆེས་ཆེར་ཆོས་འདི་འདུ།།
སྙམ་དུ་བསམ་ན་ཆོས་ཀྱི་དགའ་སྟོན་བསྟན།།

རྩ་བ་འདི་ནི་སྙན་ངག་གོ་བདེར་ཡོད།།
འགྲེལ་པ་གསུང་རབ་སྒྲབ་རྒྱུད་ཁོ་ནར་ཡོད།།
ཚིག་ལ་གཟིགས་དང་རྩོམ་པའི་ལྟད་མོ་ཡོད་།།
དོན་ལ་གཟིགས་དང་དམ་ཆོས་བྱེད་ལུགས་ཡོད།།

ཕུལ་བྱུང་ལུགས་གསུང་ཀུན་ཉུང་ངུར་བསྡུས།།
མི་ཡི་རིགས་ཀྱིས་གཟིགས་ཕྱིར་ཚིག་འདི་བྲིས།།
ལེགས་ཤེས་ངེས་སེམས་བསྐྱེད་དེ་ཆེས་ཆེར་འཕེལ།།
བློ་གྲོས་ཡོད་ཚོས་དགོངས་མོད་དོན་གོ་ཆོངས།།

འགའ་ཞིག་དོན་མེད་ཚིག་གི་མདུད་པ་རྩོམ།།
གཞན་དག་འབྲེལ་མེད་བླུན་ཚིག་བབ་ཅོལ་སྨྲ།།
སྡེབ་ལེགས་གསལ་བར་རྩོམ་པའི་རྩོམ་མཁན་ནི།།
གངས་རིའི་ཁྲོད་འདིར་བློ་བཟང་གྲགས་པའི་དཔལ།།

ཕན་སེམས་གློག་ཕྲེང་རྒྱུ་བས་ཉེར་མཛེས་པའི།།
ཀུན་སློང་དགེ་སེམས་ཆར་སྤྲིན་འཁྲིགས་པ་ལས།།
ཕུན་ཚོགས་སྐྱིད་རིན་ཆེན་ཆར་བཞིན་བབ།།
ཐམས་ཅད་དགའ་བདེའི་དཔལ་ལ་སྤྱོད་གྱུར་ཅིག།

བདག་དང་མཐས་ཡས་འགྲོ་བ་མ་ལུས་པ།།
ཡི་དམ་གསུང་གི་དངོས་གྲུབ་བརྟན་པར་བྱས།།
ཕན་དང་དཔག་ཡས་བདེ་བ་མ་ལུས་དང་།།
དོན་དམ་མཆོག་གི་དངོས་གྲུབ་ཐོབ་པར་ཤོག།




རྟེན་འབྲེལ་བསྟོད་པ་བཞུགས་སོ།།





༄༅། །རྟེན་འབྲེལ་བསྟོད་པ་བཞུགས་སོ། །



མོ་གུ་རུ་མཉྫུ་གྷོ་ཥཱ་ཡ།

གང་ཞིག་གཟིགས་ཤིང་གསུང་བ་ཡིས། །
མཁྱེན་དང་སྟོན་པ་བླ་ན་མེད། །
རྒྱལ་བ་རྟེན་ཅིང་འབྲེལ་བར་འབྱུང༌། །
གཟིགས་ཤིང་འདོམས་པ་དེ་ལ་འདུད། །

འཇིག་རྟེན་རྒུད་པ་ཇི་སྙེད་པ། །
དེ་ཡི་རྩ་བ་མ་རིག་སྟེ། །
གང་ཞིག་མཐོང་བས་དེ་ལྡོག་པ། །
རྟེན་ཅིང་འབྲེལ་བར་འབྱུང་བར་གསུངས། །

དེ་ཚེ་བློ་དང་ལྡན་པ་ཡིས། །
རྟེན་ཅིང་འབྲེལ་བར་འབྱུང་བའི་ལམ། །
ཁྱོད་ཀྱི་བསྟན་པའི་གནད་ཉིད་དུ། །
ཇི་ལྟར་ཁོང་དུ་ཆུད་མི་འགྱུར། །

དེ་ལྟ་ལགས་ན་མགོན་ཁྱོད་ལ། །
བསྟོད་པའི་སྒོ་ནི་སུ་ཞིག་གིས། །
བརྟེན་ནས་འབྱུང་བ་གསུངས་པ་ལས། །
ངོ་མཚར་གྱུར་བ་ཅི་ཞིག་རྙེད། །

གང་གང་རྐྱེན་ལ་རག་ལས་པ། །
དེ་དེ་རང་བཞིན་གྱིས་སྟོང་ཞེས། །
གསུངས་པ་འདི་ལས་ཡ་མཚན་པའི། །
ལེགས་འདོམས་ཚུལ་ནི་ཅི་ཞིག་ཡོད། །

གང་དུ་བཟུང་བའི་བྱིས་པ་རྣམས། །
མཐར་འཛིན་འཆིང་བ་བརྟན་བྱེད་ཅིང༌། །
དེ་ཉིད་མཁས་ལ་སྤྲོས་པ་ཡི། །
དྲ་བ་མ་ལུས་གཅོད་པའི་སྒོ། །

བསྟན་འདི་གཞན་དུ་མ་མཐོང་བས། །
སྟོན་པ་ཞེས་བྱ་ཁྱོད་ཉིད་དེ། །
ཝ་སྐྱེས་ལ་ནི་སེང་གེ་བཞིན། །
མུ་སྟེགས་ཅན་ལ་གཅམ་བུའི་ཚིག །

ཨེ་མའོ་སྟོན་པ་ཨེ་མའོ་སྐྱབས། །
ཨེ་མའོ་སྨྲ་མཆོག་ཨེ་མའོ་མགོན། །
རྟེན་ཅིང་འབྲེལ་འབྱུང་ལེགས་གསུངས་པའི། །
སྟོན་པ་དེ་ལ་བདག་ཕྱག་འཚལ། །

ཕན་མཛད་ཁྱོད་ཀྱིས་འགྲོ་བ་ལ། །
སྨན་པའི་སླད་དུ་བཀའ་བསྩལ་པ། །
བསྟན་པའི་སྙིང་བོ་སྟོང་བ་ཉིད། །
ངེས་པའི་རྒྱུ་མཚན་ཟླ་མེད་པ། །

རྟེན་ཅིང་འབྲེལ་བར་འབྱུང་བའི་ཚུལ། །
འགལ་བ་དང་ནི་མ་གྲུབ་པར། །
མཐོང་བ་འདི་ཡིས་ཁྱོད་ཀྱི་ལུགས། །
ཇི་ལྟར་ཁོང་དུ་ཆུད་པར་ནུས། །

ཁྱོད་ནི་ནམ་ཞིག་སྟོང་བ་ཉིད། །
རྟེན་འབྱུང་དོན་དུ་མཐོང་བ་ན། །
རང་བཞིན་གྱིས་ནི་སྟོང་བ་ན། །
བྱ་བྱེད་འཐད་པའང་མི་འགལ་ཞིང༌། །

དེ་ལས་ལྡོག་པར་མཐོང་བ་ན། །
སྟོང་ལ་བྱ་བ་མི་རུང་ཞིང༌། །
བྱ་དང་བཅས་ལ་སྟོང་མེད་པས། །
ཉམ་ངའི་གཡང་དུ་ལྟུང་བར་བཞེད། །

དེ་ཕྱིར་ཁྱོད་ཀྱི་བསྟན་པ་ལ། །
རྟེན་འབྱུང་མཐོང་བ་ལེགས་པར་བསྔགས། །
དེ་ཡང་ཀུན་ཏུ་མེད་པ་དང༌། །
རང་བཞིན་གྱིས་ནི་ཡོད་པས་མིན། །

ལྟོས་མེད་ནམ་མཁའི་མེ་ཏོག་བཞིན། །
དེས་ན་མ་བརྟེན་ཡོད་མ་ཡིན། །
ངོ་བོས་གྲུབ་ན་དེ་འགྲུབ་པ། །
རྒྱུ་དང་རྐྱེན་ལ་ལྟོས་པ་འགལ། །

དེ་ཕྱིར་བརྟེན་ནས་འབྱུང་བ་ལས། །
མ་གཏོགས་ཆོས་འགའ་ཡོད་མིན་པས། །
རང་བཞིན་གྱིས་ནི་སྟོང་བ་ལས། །
མ་གཏོགས་ཆོས་འགའ་མེད་པར་གསུངས། །

རང་བཞིན་ལྡོག་པ་མེད་པའི་ཕྱིར། །
ཆོས་རྣམས་རང་བཞིན་འགའ་ཡོད་ན། །
མྱ་ངན་འདས་པ་མི་རུང་ཞིང༌། །
སྤྲོས་ཀུན་ལྡོག་པ་མེད་པར་གསུངས། །

དེ་ཕྱིར་རང་བཞིན་རྣམ་བྲལ་ཞེས། །
སེང་གེའི་སྒྲ་ཡིས་ཡང་ཡང་དུ། །
མཁས་པའི་ཚོགས་སུ་ལེགས་གསུངས་པ། །
འདི་ལ་སུ་ཡིས་འགོང་བར་ནུས། །

རང་བཞིན་འགའ་ཡང་མེད་པ་དང༌། །
འདི་ལ་བརྟེན་ནས་འདི་འབྱུང་བའི། །
རྣམ་གཞག་ཐམས་ཅད་འཐད་པ་གཉིས། །
མི་འགལ་འདུ་བ་སྨོས་ཅི་དགོས། །

བརྟེན་ནས་འབྱུང་བའི་རྒྱུ་མཚན་གྱིས། །
མཐར་ལྟ་བ་ལ་མི་བརྟེན་ཞེས། །
ལེགས་གསུངས་འདི་ནི་མགོན་ཁྱོད་ཀྱི། །
སྨྲ་བ་བླ་ན་མེད་པའི་རྒྱུ། །

འདི་ཀུན་ངོ་བོས་སྟོང་བ་དང༌། །
འདི་ལས་འདི་འབྲས་འབྱུང་བ་ཡི། །
ངེས་པ་གཉིས་པོ་ཕན་ཚུན་དུ། །
གེགས་མེད་པར་ནི་གྲོགས་བྱེད་པ། །

འདི་ལས་ངོ་མཚར་གྱུར་བ་དང༌། །
འདི་ལས་རྨད་དུ་བྱུང་བ་གང༌། །
ཚུལ་འདིས་ཁྱོད་ལ་བསྟོད་ན་ནི། །
བསྟོད་པར་འགྱུར་གྱི་གཞན་དུ་མིན། །

རྨོངས་པས་བྲན་དུ་བཟུང་བ་ཡིས། །
གང་ཞིག་ཁྱོད་དང་ཞེ་འགྲས་པ། །
དེ་ཡིས་རང་བཞིན་མེད་པའི་སྒྲ། །
མི་བཟོད་གྱུར་ལ་མཚར་ཅི་ཡོད། །

ཁྱོད་ཀྱི་གསུང་གི་གཅེས་པའི་མཛོད། །
བརྟེན་ནས་འབྱུང་བ་ཁས་བླངས་ནས། །
སྟོང་ཉིད་ང་རོ་མི་བཟོད་པ། །
འདི་ལ་ཁོ་བོ་ངོ་མཚར་གྱུར། །

རང་བཞིན་མེད་ལ་བཀྲི་བའི་སྒོ། །
བླ་མེད་རྟེན་ཅིང་འབྲེལ་འབྱུང་གི །
མིང་ཉིད་ཀྱིས་ནི་རང་བཞིན་དུ། །
འཛིན་ན་ད་ཀོ་སྐྱེ་བོ་འདི། །

འཕགས་མཆོག་རྣམས་ཀྱིས་ལེགས་བགྲོད་པའི། །
འཇུག་ངོགས་ཟླ་དང་བྲལ་གྱུར་པ། །
ཁྱོད་དགྱེས་གྱུར་པའི་ལམ་བཟང་དེར། །
ཐབས་གང་གིས་ནི་བཀྲི་བར་བྱ། །

རང་བཞིན་བཅོས་མིན་ལྟོས་མེད་དང༌། །
རྟེན་འབྲེལ་ལྟོས་དང་བཅོས་མ་གཉིས། །
ཇི་ལྟ་བུ་ན་གཞི་གཅིག་ལ། །
མི་འགལ་འདུ་བ་ཉིད་དུ་འགྱུར། །

དེ་ཕྱིར་བརྟེན་ནས་འབྱུང་བ་གང༌། །
རང་བཞིན་གྱིས་ནི་གདོད་མ་ནས། །
རྣམ་པར་དབེན་ཡང་དེར་སྣང་བས། །
འདི་ཀུན་སྒྱུ་མ་བཞིན་དུ་གསུངས། །

ཁྱོད་ཀྱིས་ཇི་ལྟར་བསྟན་པ་ལ། །
རྒོལ་བ་འགས་ཀྱང་ཆོས་མཐུན་དུ། །
གླགས་མི་རྙེད་པར་གསུངས་པ་ཡང༌། །
འདི་ཉིད་ཀྱིས་ནི་ལེགས་པར་འཁུམས། །

ཅི་སླད་ཅེ་ན་འདི་བཤད་པས། །
མཐོང་དང་མ་མཐོང་དངོས་པོ་ལ། །
སྒྲོ་འདོགས་པ་དང་སྐུར་འདེབས་ཀྱི། །
གོ་སྐབས་རིང་དུ་མཛད་ཕྱིར་རོ། །

ཁྱོད་ཀྱི་སྨྲ་བ་ཟླ་མེད་པར། །
མཐོང་བའི་རྒྱུ་མཚན་རྟེན་འབྱུང་གི །
ལམ་འདི་ཉིད་ཀྱི་གསུང་གཞན་ཡང༌། །
ཚད་མར་གྱུར་བར་ངེས་པ་སྐྱེ། །

དོན་བཞིན་གཟིགས་ནས་ལེགས་གསུངས་པ། །
ཁྱོད་ཀྱི་རྗེས་སུ་སློབ་པ་ལ། །
རྒུད་པ་ཐམས་ཅད་རིང་དུ་གྱུར། །
ཉེས་ཀུན་རྩ་བ་ལྡོག་ཕྱིར་རོ། 

ཁྱོད་ཀྱི་བསྟན་ལས་ཕྱིར་ཕྱོགས་པས། །
ཡུན་རིང་ངལ་བ་བསྟེན་བྱས་ཀྱང༌། །
ཕྱི་ཕྱིར་སྐྱོན་རྣམས་བོས་པ་བཞིན། །
བདག་ཏུ་ལྟ་བ་བརྟན་ཕྱིར་རོ། །

ཨེ་མའོ་མཁས་པ་འདི་གཉིས་ཀྱི། །
ཁྱད་པར་ཁོང་དུ་ཆུད་གྱུར་བ། །
དེ་ཚེ་རྐང་གི་ཁོང་ནས་ནི། །
ཁྱོད་ལ་ཅི་ཕྱིར་གུས་མི་འགྱུར། །

ཁྱོད་གསུང་དུ་མ་ཅི་ཞིག་སྨོས། །
ཆ་ཤས་རེ་ཡི་དོན་ཙམ་ལའང༌། །
འོལ་སྤྱི་ཙམ་གྱི་ངེས་རྙེད་པ། །
དེ་ལའང་མཆོག་གི་བདེ་བ་སྟེར། །

ཀྱི་ཧུད་བདག་བློ་རྨོངས་བའི་བཅོམ། །
འདི་འདྲའི་ཡོན་ཏན་ཕུང་བོ་ལ། །
རིང་ནས་སྐྱབས་སུ་སོང་གྱུར་ཀྱང༌། །
ཡོན་ཏན་ཆ་ཙམ་མ་འཚལ་ཏོ། །

འོན་ཀྱང་འཆི་བདག་ཁར་ཕྱོགས་པའི། །
སྲོག་གི་རྒྱུན་ནི་མ་ནུབ་བར། །
ཁྱོད་ལ་ཅུང་ཟད་ཡིད་ཆེས་པ། །
འདི་ཡང་སྐལ་བ་བཟང་སྙམ་བགྱིད། །

སྟོན་པའི་ནང་ན་རྟེན་འབྲེལ་སྟོན་པ་དང༌། །
ཤེས་རབ་ནང་ན་རྟེན་འབྲེལ་ཤེས་པ་གཉིས། །
འཇིག་རྟེན་དག་ན་རྒྱལ་བའི་དབང་པོ་བཞིན། །
ཕུལ་བྱུང་ལེགས་པར་ཁྱོད་མཁྱེན་གཞན་གྱིས་མིན། །

ཁྱོད་ཀྱིས་ཇི་སྙེད་བཀའ་བསྩལ་བ། །
རྟེན་འབྲེལ་ཉིད་ལས་བརྩམས་ནས་འཇུག །
དེ་ཡང་མྱ་ངན་འདའ་ཕྱིར་ཏེ། །
ཞི་འགྱུར་མིན་མཛད་ཁྱོད་ལ་མིན། །

ཀྱེ་མའོ་ཁྱོད་ཀྱི་བསྟན་པ་ནི། །
གང་གི་རྣ་བའི་ལམ་སོང་བ། །
དེ་དག་ཐམས་ཅད་ཞི་འགྱུར་ཕྱིར། །
ཁྱོད་བསྟན་འཛིན་པར་སུ་མི་གུས། །

ཕས་རྒོལ་མཐའ་དག་འཇོམས་པ་དང༌། །
ལྟག་འོག་འགལ་འདུས་སྟོང་བ་དང༌། །
སྐྱེ་རྒུའི་དོན་གཉིས་སྟེར་བྱེད་པ། །
ལུགས་འདིར་ཁོ་བོ་སྤྲོ་བ་འཕེལ། །

འདི་ཡི་ཕྱིར་དུ་ཁྱོད་ཀྱིས་ནི། །
ལ་ལར་སྐུ་དང་གཞན་དུ་སྲོག །
སྡུག་པའི་གཉེན་དང་ལོངས་སྤྱོད་ཚོགས། །
གྲངས་མེད་བསྐལ་བར་ཡང་ཡང་བཏང༌། །

གང་གི་ཡོན་ཏན་མཐོང་བ་ཡིས། །
ལྕགས་ཀྱུ་ཉ་ལ་ཇི་བཞིན་དུ། །
ཉིད་ཀྱི་ཐུགས་དྲངས་ཅོས་དེ་ནི། །
ཁྱོད་ལས་མ་ཐོས་སྐལ་བ་ཞན། །

དེ་ཡི་མྱ་ངན་ཤུགས་ཀྱིས་ནི། །
སྡུག་པའི་བུ་ལ་མ་ཡི་ཡིད། །
རྗེས་སུ་སོང་བ་ཇི་བཞིན་དུ། །
བདག་གི་ཡིད་ནི་གཏོང་མི་བྱེད། །

འདི་ལའང་ཁྱོད་གསུང་བསམས་པ་ན། །
མཚན་དཔེའི་དཔལ་གྱིས་རབ་ཏུ་འབར། །
འོད་ཀྱི་དྲ་བས་ཡོངས་བསྐོར་བའི། །
སྟོན་པ་དེ་ཡི་ཚངས་དབྱངས་ཀྱིས། །

འདི་ནིའདིལྟར་གསུངས་སྙམ་དུ། །
ཡིད་ལ་ཐུབ་པའི་གཟུགས་བརྙན་ནི། །
ཤར་བ་ཙམ་ཡང་ཚ་བ་ཡིས། །
གདུང་ལ་ཟླ་ཟེར་བཞིན་དུ་སྨན། །

དེ་ལྟར་རྨད་དུ་བྱུང་བ་ཡི། །
ལུགས་བཟང་དེ་ཟང་མི་མཁས་པའི། །
སྐྱེ་བོ་བལ་བ་ཛ་བཞིན་དུ། །
རྣམ་པ་ཀུན་ཏུ་འཛིངས་པར་བྱས། །

ཚུལ་འདི་མཐོང་ནས་བདག་གིས་ནི། །
འབད་པ་དུ་མས་མཁས་པ་ཡི། །
རྗེས་སུ་འབྲངས་ན་ཁྱོད་ཀྱིས་ནི། །
དགོངས་པ་ཡང་དང་ཡང་དུ་བཙལ། །

དེ་ཚེ་རང་བཞིན་སྡེ་བ་ཡི། །
གཞུང་མང་དག་ལ་སྦྱངས་པ་ན། །
ཕྱི་ཕྱིར་ཐེ་ཚོམ་དྲ་བ་ཡིས། །
བདག་གི་ཡིད་ནི་ཀུན་ཏུ་གདུངས། །

ཁྱོད་ཀྱི་བླ་མེད་ཐེག་པའི་ཚུལ། །
ཡོད་དང་མེད་པའི་མཐའ་སྤངས་ཏེ། །
ཇི་བཞིན་འགྲེལ་བར་ལུང་བསྟན་པ། །
ཀླུ་སྒྲུབ་གཞུང་ལུགས་ཀུན་དའི་ཚལ། །

དྲི་མེད་མཁྱེན་པའི་དཀྱིལ་འཁོར་རྒྱས། །
གསུང་རབ་མཁའ་ལ་ཐོགས་མེད་རྒྱུ། །
མཐར་འཛིན་སྙིང་གི་མུན་པ་སེལ། །
ལོག་སྨྲའི་རྒྱུ་སྐར་ཟིལ་གནོན་པ། །

དཔལ་ལྡན་ཟླ་བའི་ལེགས་བཤད་ཀྱི། །
འོད་དཀར་འཕྲེང་བས་གསལ་བྱས་པ། །
བླ་མའི་དྲིན་གྱིས་མཐོང་བའི་ཚེ། །
བདག་གི་ཡིད་ཀྱིས་ངལ་གསོ་ཐོབ། །

མཛད་པ་ཀུན་ལས་གསུང་གི་ནི། །
མཛད་པ་མཆོག་ཡིན་དེ་ཡང་ནི། །
དེ་ཉིད་ཡིན་ཕྱིར་མཁས་པ་ཡིས། །
འདི་ལས་སངས་རྒྱས་རྗེས་དྲན་བྱོས། །

སྟོན་དེའི་རྗེས་སུ་རབ་ཏུ་བྱུང་གྱུར་ཏེ། །
རྒྱལ་བའི་གསུང་ལ་སྦྱངས་པ་མི་དམན་ཞིང༌། །
རྣལ་འབྱོར་སྤྱོད་ལ་བརྩོན་པའི་དགེ་སློང་ཞིག །
དྲང་སྲོང་ཆེན་པོ་དེ་ལ་དེ་ལྟར་གུས། །

སྟོན་པ་བླ་ན་མེད་པའི་བསྟན་པ་དང༌། །
མཇལ་བ་འདི་འདྲ་བླ་མའི་དྲིན་ཡིན་པས། །
དགེ་བ་འདི་ཡང་འགྲོ་བ་མ་ལུས་པ། །
བཤེས་གཉེན་དམ་པའི་འཛིན་པའི་རྒྱུ་རུ་བསྔོ། །

ཕན་མཛད་དེ་ཡི་བསྟན་པ་འང་སྲིད་པའི་མཐར། །
ངན་རྟོག་རླུང་གིས་རྣམ་པར་མི་གཡོ་ཞིང༌། །
བསྟན་པའི་ངང་ཚུལ་ཤེས་ནས་སྟོན་པ་ལ། །
ཡིད་ཆེས་རྙེད་པས་རྟག་ཏུ་གང་བར་ཤོག །

བརྟེན་ནས་འབྱུང་བའི་དེ་ཉིད་གསལ་མཛད་པ། །
ཐུབ་པའི་ལུགས་བཟང་སྐྱེ་བ་ཐམས་ཅད་དུ། །
ལུས་དང་སྲོག་ཀྱང་བཏང་ནས་འཛིན་པ་ལ། །
སྐད་ཅིག་ཙམ་ཡང་ལྷོད་པར་མ་གྱུར་ཅིག །

འདྲེན་པ་མཆོག་དེས་དཀའ་བ་གྲངས་མེད་ཀྱིས། །
ནན་ཏན་སྙིང་བོ་མཛད་ནས་བསྒྲུབས་པ་འདི། །
ཐབས་གང་ཞིག་གིས་འཕེལ་བར་འགྱུར་སྙམ་པའི། །
རྣམ་པར་དཔྱོད་པའི་ཉིན་མཚན་འདའ་བར་ཤོག །

ལྷག་བསམ་དག་པས་ཚུལ་དེར་བརྩོན་པ་ན། །
ཚངས་དང་དབང་པོ་འཇིག་རྟེན་སྐྱོང་བ་དང༌། །
ལེགས་ལྡན་ནག་པོ་ལ་སོགས་སྲུང་མས་ཀྱང༌། །
གཡེལ་བ་མེད་པར་རྟག་ཏུ་གྲོགས་བྱེད་ཤོག །

ཅེས་པ་འདི་ནི་རྗེ་ཙོང་ཁ་བ་བློ་བཟང་གྲགས་པས་མཛད་པའོ། །


ལམ་རིམ་བསྡུས་དོན།


ལམ་རིམ་བསྡུས་དོན།



ཕུན་ཚོགས་དགེ་ལེགས་བྱེ་བས་བསྐྲུན་པའི་སྐུ། 
མཐའ་ཡས་འགྲོ་བའི་རེ་བ་སྐོང་བའི་གསུང༌། 
མ་ལུས་ཤེས་བྱ་ཇི་བཞིན་གཟིགས་པའི་ཐུགས། 
ཤཱཀྱའི་གཙོ་བོ་དེ་ལ་མགོས་ཕྱག་འཚལ། 

ཟླ་མེད་སྟོན་པ་དེ་ཡི་སྲས་ཀྱི་མཆོག 
རྒྱལ་བའི་མཛད་པ་ཀུན་གྱི་ཁུར་བསྣམས་ནས། 
གྲངས་མེད་ཞིང་དུ་སྤྲུལ་པས་རྣམ་རོལ་བ། 
མི་ཕམ་འཇམ་པའི་དབྱངས་ལ་ཕྱག་འཚལ་ལོ། 

ཤིན་ཏུ་དཔག་པར་དཀའ་བ་རྒྱལ་བའི་ཡུམ། 
ཇི་བཞིན་དགོངས་པ་འགྲེལ་མཛད་འཛམ་གླིང་རྒྱན། 
ཀླུ་སྒྲུབ་ཐོཌ་མེད་ཅེས་ནི་ས་གསུམ་ན། 
ཡོངས་སུ་གྲགས་པའི་ཞབས་ལ་བདག་ཕྱག་འཚལ། 

ཤིང་རྟ་ཆེན་པོ་གཉིས་ལས་ལེགས་བརྒྱུད་པའི། 
ཟབ་མོའི་ལྟ་བ་རྒྱ་ཆེན་སྤྱོད་པའི་ལམ། 
མ་ནོར་ཡོངས་སུ་རྫོགས་པའི་གནད་བསྡུས་པའི། 
གདམས་པའི་མཛོད་འཛིན་མར་མེ་མཛད་ལ་འདུད། 

རབ་འབྱམས་གསུང་རབ་ཀུན་ལ་ལྟ་བའི་མིག 
སྐལ་བཟང་ཐར་པར་བགྲོད་པའི་འཇུག་ངོགས་མཆོག 
བརྩེ་བས་བསྐྱོད་པའི་ཐབས་མཁས་མཛད་པ་ཡིས། 
གསལ་མཛད་བཤེས་གཉེན་རྣམས་ལ་གུས་ཕྱག་འཚལ། 

འཛམ་གླིང་མཁས་པ་ཡོངས་ཀྱི་གཙུག་གི་རྒྱན། 
སྙན་པའི་བ་དན་འགྲོ་ན་ལྷང་ངེ་བ། 
ཀླུ་སྒྲུབ་ཐོགས་མེད་གཉིས་ལས་རིམ་བཞིན་དུ། 
ལེགས་བརྒྱུད་བྱང་ཆུབ་ལམ་གྱི་རིམ་པ་ནི། 

སྐྱེ་དགུའི་འདོད་དོན་མ་ལུས་སྐོང་བས་ན། 
གདམས་པ་རིན་ཆེན་དབང་གི་རྒྱལ་པོ་སྟེ། 
གཞུང་བཟང་སྟོང་གི་ཆུ་བོ་འདུ་བའི་ཕྱིར། 
དཔལ་ལྡན་ལེགས་པར་བཤད་པའི་རྒྱ་མཚོའང་ཡིན། 

བསྟན་པ་ཐམས་ཅད་འགལ་མེད་རྟོགས་པ་དང༌། 
གསུང་རབ་མ་ལུས་གདམས་པར་འཆར་བ་དང༌། 
རྒྱལ་བའི་དགོངས་པ་བདེ་བླག་རྙེད་པ་དང༌། 
ཉེས་སྤྱོད་ཆེན་པོའི་གཡང་ས་ལས་ཀྱང་བསྲུང༌། 

དེ་ཕྱིར་རྒྱ་བོད་མཁས་པའི་སྐྱེ་བོ་ནི། 
སྐལ་ལྡན་དུ་མས་བསྟེན་པའི་གདམས་པ་མཆོག 
སྐྱེས་བུ་གསུམ་གྱི་ལམ་གྱི་རིམ་པ་ཡིས། 
ཡིད་རབ་མི་འཕྲོག་དཔྱོད་ལྡན་སུ་ཞིག་ཡོད། 

གསུང་རབ་ཀུན་གྱི་སྙིང་པོ་བསྡུ་བསྡུ་བ། 
ཚུལ་འདི་ཐུན་རེ་སྟོན་དང་ཉན་པས་ཀྱང༌། 
དམ་ཆོས་འཆད་དང་ཐོས་པའི་ཕན་ཡོན་ཚོགས། 
རླབས་ཆེན་སྡུད་པར་ངེས་པས་དེ་དོན་བསམ། 

དེ་ནས་འདི་ཕྱིའི་ལེགས་ཚོགས་ཇི་སྙེད་པའི། 
རྟེན་འབྲེལ་ལེགས་པར་འགྲིག་པའི་རྩ་བ་ནི། 
ལམ་སྟོན་བཤེས་གཉེན་དམ་པ་འབད་པ་ཡིས། 
བསམ་དང་སྦྱོར་བས་ཚུལ་བཞིན་བསྟེན་པ་རུ། 

མཐོང་ནས་སྲོག་གི་ཕྱིར་ཡང་མི་གཏོང་བར། 
བཀའ་བཞིན་སྒྲུབ་པའི་མཆོད་པས་མཉེས་པར་བྱེད། 
རྣལ་འབྱོར་ངས་ཀྱང་ཉམས་ལེན་དེ་ལྟར་བགྱིས། 
ཐར་འདོད་ཁྱེད་ཀྱང་དེ་བཞིན་བསྐྱང་འཚལ་ལོ། 

དལ་བའི་རྟེན་འདི་ཡིད་བཞིན་ནོར་ལས་ལྷག 
འདི་འདྲ་རྙེད་པ་ད་རེས་ཙམ་ཞིག་ཡིན། 
རྙེད་དཀའ་འཇིག་སླ་ནམ་མཁའི་གློག་དང་འདྲ། 
ཚུལ་འདི་བསམས་ནས་འཇིག་རྟེན་བྱ་བ་ཀུན། 

སྦུན་པ་འཕྱར་བ་བཞིན་དུ་རྟོགས་གྱུར་ནས། 
ཉིན་མཚན་ཀུན་ཏུ་སྙིང་པོ་ལེན་པ་དགོས། 
རྣལ་འབྱོར་ངས་ཀྱང་ཉམས་ལེན་དེ་ལྟར་བགྱིས། 
ཐར་འདོད་ཁྱེད་ཀྱང་དེ་བཞིན་བསྐྱང་འཚལ་ལོ། 

ཤི་ནས་ངན་འགྲོར་མི་སྐྱེའི་གདེང་མེད་ཅིང༌། 
དེ་ཡི་འཇིགས་སྐྱོབ་དཀོན་མཆོག་གསུམ་དུ་ངེས། 
དེ་ཕྱིར་སྐྱབས་འགྲོ་ཤིན་ཏུ་བརྟན་པ་དང༌། 
དེ་ཡི་བསླབ་བྱ་ཉམས་པ་མེད་པར་བྱ། 

དེ་ཡང་དཀར་ནག་ལས་འབྲས་ལེགས་བསམས་ནས། 
བླང་དོར་ཚུལ་བཞིན་སྒྲུབ་ལ་རག་ལས་སོ། 
རྣལ་འབྱོར་ངས་ཀྱང་྾། 
ཐར་འདོད་ཁྱེད་ཀྱང་྾། 

ལམ་མཆོག་སྒྲུབ་ལ་མཚན་ཉིད་ཚང་བའི་རྟེན། 
མ་རྙེད་བར་དུ་ས་ཕྱོད་མི་འོང་བས། 
དེ་ཡི་མ་ཚང་མེད་པའི་རྒྱུ་ལ་བསླབ། 
སྒོ་གསུམ་སྡིག་ལྟུང་དྲི་མས་སྤགས་པ་འདི། 

ལྷག་པར་ལས་སྒྲིབ་སྦྱོང་བ་གནད་ཆེ་བས། 
རྒྱུན་དུ་སྟོབས་བཞི་ཚང་བར་བསྟེན་པ་གཅེས། 
རྣལ་འབྱོར་ངས་ཀྱང་྾། 
ཐར་འདོད་ཁྱེད་྾། 

སྡུག་བདེན་ཉེས་དམིགས་བསམ་ལ་མ་འབད་ན།།
ཐར་པ་དོན་གཉེར་ཇི་བཞིན་མི་སྐྱེ་ཞིང༌། 
ཀུན་འབྱུང་འཁོར་བའི་འཇུག་རིམ་མ་བསམས་ན། 
འཁོར་བའི་རྩ་བ་གཅོད་ཚུལ་མི་ཤེས་པས། 

སྲིད་ལས་ངེས་འབྱུང་སྐྱོ་ཤས་བརྟན་པ་དང༌། 
འཁོར་བར་གང་གིས་བཅིངས་པ་ཤེས་པ་གཅེས། 
རྣལ་འབྱོར་ངས་ཀྱང་྾། 
ཐར་འདོད་ཁྱེད་ཀྱང་྾། 

སེམས་བསྐྱེད་ཐེག་མཆོག་ལམ་གྱི་གཞུང་ཤིང་སྟེ། 
རླབས་ཆེན་སྤྱོད་པ་རྣམས་ཀྱི་གཞི་དང་རྟེན། 
ཚོགས་གཉིས་ཀུན་ལ་གསེར་འགྱུར་རྩི་ལྟ་བུ། 
རབ་འབྱམས་དགེ་ཚོགས་སྡུད་པའི་བསོད་ནམས་གཏེར། 

དེ་ལྟར་ཤེས་ནས་རྒྱལ་སྲས་དཔའ་བོ་རྣམས། 
རིན་ཆེན་སེམས་མཆོག་ཐུགས་དམ་མཐིལ་དུ་འཛིན། 
རྣལ་འབྱོར་ངས་ཀྱང་྾། 
ཐར་འདོད་ཁྱེད་ཀྱང་྾། 

སྦྱིན་པ་འགྲོ་བའི་རེ་སྐོང་ཡིད་བཞིན་ནོར། 
སེར་སྣའི་མདུད་པ་གཅོད་པའི་མཚོན་ཆ་མཆོག 
མ་ཞུམ་སྙིང་སྟོབས་བསྐྱེད་པའི་རྒྱལ་སྲས་སྤྱོད། 
སྙན་པའི་གྲགས་པ་ཕྱོགས་བཅུར་སྒྲོག་པའི་གཞི། 

དེ་ལྟར་ཤེས་ནས་ལུས་དང་ལོངས་སྤྱོད་དགེ །
ཡོངས་སུ་གཏོང་བའི་ལམ་བཟང་མཁས་པས་བསྟེན། 
རྣལ་འབྱོར་ངས་ཀྱང་྾། 
ཐར་འདོད་ཁྱེད་ཀྱང་྾། 

ཚུལ་ཁྲིམས་ཉེས་སྤྱོད་དྲི་མ་འཁྲུད་པའི་ཆུ། 
ཉོན་མོངས་ཚ་གདུང་སེལ་བའི་ཟླ་བའི་འོད། 
སྐྱེ་དགུའི་དབུས་ན་ལྷུན་པོ་ལྟ་བུར་བརྗིད། 
སྟོབས་ཀྱིས་བསྡིགས་པ་མེད་པར་འགྲོ་ཀུན་འདུད། 

དེ་ལྟར་ཤེས་ནས་ཡང་དག་བླངས་པའི་ཁྲིམས། 
དམ་པ་རྣམས་ཀྱིས་མིག་བཞིན་བསྲུང་བར་མཛད། 
རྣལ་འབྱོར་ངས་ཀྱང་྾། 
ཐར་འདོད་ཁྱེད་ཀྱང་྾། 

བཟོད་པ་སྟོབས་ལྡན་རྣམས་ལ་རྒྱན་གྱི་མཆོག 
ཉོན་མོངས་གདུང་བའི་དཀའ་ཐུབ་ཀུན་གྱི་ཕུལ། 
ཞེ་སྡང་ལག་འགྲོའི་དགྲ་ལ་ནམ་མཁའ་ལྡིང༌། 
ཚིག་རྩུབ་མཚོན་ལ་སྲ་བའི་གོ་ཆ་ཡིན། 

དེ་ལྟར་ཤེས་ནས་བཟོད་མཆོག་གོ་ཆ་ལ། 
རྣམ་པ་སྣ་ཚོགས་ཚུལ་གྱིས་གོམས་པར་མཛད། 
རྣལ་འབྱོར་ངས་྾། 
ཐར་འདོད་ཁྱེད་ཀྱང་྾། 

མི་ལྡོག་བརྟན་པའི་བརྩོན་འགྲུས་གོ་བགོས་ན། 
ལུང་རྟོགས་ཡོན་ཏན་ཡར་ངོའི་ཟླ་བཞིན་འཕེལ། 
སྤྱོད་ལམ་ཐམས་ཅད་དོན་དང་ལྡན་པར་འགྱུར། 
གང་བརྩམས་ལས་ཀྱི་མཐའ་རྣམས་ཡིད་བཞིན་འགྲུབ། 

དེ་ལྟར་ཤེས་ནས་ལེ་ལོ་ཀུན་སེལ་བའི། 
རླབས་ཆེན་བརྩོན་འགྲུས་རྒྱལ་སྲས་རྣམས་ཀྱིས་བརྩམས། 
རྣལ་འབྱོར་ངས་ཀྱང་྾། 
ཐར་འདོད་ཁྱེད་ཀྱང་྾། 

བསམ་གཏན་སེམས་ལ་དབང་བསྒྱུར་རྒྱལ་པོ་སྟེ། 
བཞག་ན་གཡོ་མེད་རི་ཡི་དབང་པོ་བཞིན། 
བཏང་ན་དགེ་བའི་དམིགས་པ་ཀུན་ལ་འཇུག 
ལུས་སེམས་ལས་སུ་རུང་བའི་བདེ་ཆེན་འདྲེན། 

དེ་ལྟར་ཤེས་ནས་རྣལ་འབྱོར་དབང་པོ་རྣམས། 
རྣམ་གཡེང་དགྲ་འཇོམས་ཏིང་འཛིན་རྒྱུན་དུ་བསྟེན། 
རྣལ་འབྱོར་ངས་ཀྱང་྾། 
ཐར་འདོད་ཁྱེད་ཀྱང་྾། 

ཤེས་རབ་ཟབ་མོའི་དེ་ཉིད་ལྟ་བའི་མིག 
སྲིད་པའི་རྩ་བ་དྲུངས་ནས་འབྱིན་པའི་ལམ། 
གསུང་རབ་ཀུན་ལས་བསྔགས་པའི་ཡོན་ཏན་གཏེར། 
གཏི་མུག་མུན་སེལ་སྒྲོན་མེའི་མཆོག་ཏུ་གྲགས། 

དེ་ལྟར་ཤེས་ནས་ཐར་འདོད་མཁས་པ་ཡིས། 
ལམ་དེ་འབད་པ་དུ་མས་བསྐྱེད་པར་མཛད། 
རྣལ་འབྱོར་ངས་ཀྱང་྾། 
ཐར་འདོད་ཁྱེད་ཀྱང་྾། 

རྩེ་གཅིག་བསམ་གཏན་ཙམ་ལ་འཁོར་བ་ཡི། 
རྩ་བ་གཅོད་པའི་ནུས་པ་མ་མཐོང་ཞིང༌། 
ཞི་གནས་ལམ་དང་བྲལ་བའི་ཤེས་རབ་ཀྱིས། 
ཇི་ཙམ་དཔྱད་ཀྱང་ཉོན་མོངས་མི་ལྡོག་པས། 

ཡིན་ལུགས་ཕུ་ཐག་ཆོད་པའི་ཤེས་རབ་དེ། 
གཡོ་མེད་ཞི་གནས་རྟ་ལ་བསྐྱོན་ནས་ནི། 
མཐའ་བྲལ་དབུ་མའི་རིགས་པའི་མཚོན་རྣོན་གྱིས། 
མཐར་འཛིན་དམིགས་གཏོད་ཐམས་ཅད་འཇིག་བྱེད་པའི། 

ཚུལ་བཞིན་དཔྱོད་པའི་ཡངས་པའི་ཤེས་རབ་ཀྱིས། 
དེ་ཉིད་རྟོགས་པའི་བློ་གྲོས་རྒྱས་པར་མཛད། 
རྣལ་འབྱོར་ངས་ཀྱང་྾། 
ཐར་འདོད་ཁྱེད་ཀྱང་྾། 

རྩེ་གཅིག་གོམས་པས་ཏིང་འཛིན་འགྲུབ་པ་ནི། 
སྨོས་པར་ཅི་འཚལ་ཚུལ་བཞིན་དཔྱོད་པ་ཡི། 
སོ་སོར་རྟོག་པ་ཡིས་ཀྱང་ཡིན་ལུགས་ལ། 
གཡོ་མེད་ཤིན་ཏུ་བརྟན་པར་གནས་པ་ཡི། 

ཏིང་འཛིན་བསྐྱེད་པར་མཐོང་ནས་ཞེ་ལྷག་གཉིས། 
ཟུང་འབྲེལ་སྒྲུབ་ལ་བརྩོན་རྣམས་ཡ་མཚན་ནོ། 
རྣལ་འབྱོར་ངས་ཀྱང་྾། 
ཐར་འདོད་ཁྱེད་ཀྱང་྾། 

མཉམ་གཞག་ནམ་མཁའ་ལྟ་བུའི་སྟོང་ཉིད་དང༌། 
རྗེས་ཐོབ་སྒྱུ་མ་ལྟ་བུའི་སྟོང་པ་གཉིས། 
བསྒོམས་ནས་ཐབས་ཤེས་ཟུང་དུ་འབྲེལ་བ་ཡིས། 
རྒྱལ་སྲས་སྤྱོད་པའི་ཕ་རོལ་འགྲོ་བར་བསྔགས། 

དེ་ལྟར་རྟོགས་ནས་ཕྱོགས་རེའི་ལམ་གྱིས་ནི། 
ཚིམ་པ་མེད་པ་སྐལ་བཟང་རྣམས་ཀྱི་ལུགས། 
རྣལ་འབྱོར་ངས་ཀྱང་྾། 
ཐར་འདོད་ཁྱེད་ཀྱང་྾། 

དེ་ལྟར་རྒྱུ་དང་འབྲས་བུའི་ཐེག་ཆེན་གྱི། 
ལམ་མཆོག་གཉིས་ཀར་དགོས་པའི་ཐུན་མོང་ལམ། 
ཇི་བཞིན་བསྐྱེད་ནས་མཁས་པའི་དེད་དཔོན་གྱི། 
མགོན་ལ་བརྟེན་ནས་རྒྱུད་སྡེའི་རྒྱ་མཚོ་ཆེ།།

ཞུགས་ནས་ཡོངས་རྫོགས་མན་ངག་བསྟེན་པ་དེས། 
དལ་འབྱོར་ཐོབ་པ་དོན་དང་ལྡན་པར་བྱས། 
རྣལ་འབྱོར་ངས་ཀྱང་྾། 
ཐར་འདོད་ཁྱེད་ཀྱང་྾། 

རང་གི་ཡིད་ལ་གོམས་པར་བྱ་ཕྱིར་དང༌། 
སྐལ་བཟང་གཞན་ལའང་ཕན་པར་བྱ་བའི་ཕྱིར། 
རྒྱལ་བ་དགྱེས་པའི་ཡོངས་སུ་རྫོགས་པའི་ལམ། 
གོ་སླའི་ངག་གིས་བཤད་པའི་དགེ་བ་དེས། 

འགྲོ་བ་ཀུན་ཀྱང་རྣམ་དག་ལམ་བཟང་དང༌། 
འབྲལ་མེད་གྱུར་ཅིག་ཅེས་ན་སྨོན་ལམ་འདེབས། 
རྣལ་འབྱོར་ངས་ཀྱང་྾། 
།ཐར་འདོད་ཁྱེད་ཀྱང་྾།